თბილისი (GBC) - ახალგაზრდა ფინანსისტთა და ბიზნესმენთა ასოციაცია (აფბა) ენერგეტიკის სამინისტროს სტრატეგიაში (2016-2025წწ) სწორად დასმული აქცენტებს ხედავს.

სტრატეგია აფბას ახალგაზრდა ანალიტიკოსმა ანდრია გვიდიანმა შეაფასა, აღნიშნა, რომ  დოკუმენტი ზუსტად პასუხობს იმ გამოწვევებს, რომლების წინაშეც დგას ენერგეტიკის სექტორი.

გარდა ამისა, გვიდიანი აღნიშნავს, რომ განვითარების სტრატეგიის არსებობა მნიშვნელოვანი ფაქტორია უცხოელი ინვესტორებისთვის იმდენად, რამდენადაც  მკაფიოდ გაწერილი განვითარების სტრატეგიის არსებობის შემთხვევაში, საინვესტიციო გარემო გაცილებით სტაბილური და მიმზიდველი ხდება.

გარდა ამისა, ანალიტიკოსი მიიჩნევს, რომ საზოგადოების გარკვეულ წრეებში დიდი ჰესების მშენებლობის არაპოპულარობის მიუხედავად,  ენერგოუსაფრთხოებისა და ენერგოდამოუკიდებლობის მისაღწევად მნიშვნელოვანია მუშაობის გააქტიურება

 „განხილვები არ წყდება დიდ ჰესებთან დაკავშირებით. საზოგადოების გარკვეულ წრეებში  კვლავ აქტუალურია ისეთი ობიექტების მშენებლობის საკითხი, როგორიცაა ხუდონჰესი, ნენსკრაჰესი და ა.შ. ამ მიმართულებით არსებობენ როგორც აქტიური მოწინააღმდეგეები, ისე აქტიური მომხრეები. ამ საკითხთან დაკავშირებით, ენერგეტიკის სამინისტროს მიერ გამოქვეყნებულ სტრატეგიულ დოკუმენტში, მკაფიოდ არის ნათქვამი, რომ ასეთი ობიექტების მშენებლობა, ქვეყნის ენერგოდამოუკიდებლობისა და ენერგოუსაფრთხოების უზრუნველყოფისთვის უმნიშვნელოვანეს ნაწილს წარმოადგენს. რა თქმა უნდა, ერთიანი ენერგეტიკული სისტემისთვის სასიცოცხლოდ მნიშვნელოვანია დიდი მარეგულირებელი ჰესების მშენებლობა. შესაბამისად, მიმაჩნია, რომ წინააღმდეგობის გაწევის მიუხედავად, ენერგეტიკის სამინსტრომ ყველა კანონიერი გზა უნდა გამოიყენოს ასეთი ობიექტების მშენებლობის დასაწყებად“, - ამბობს გვიდიანი.

მან დადებითად შეაფასა ენერგეტიკული ბაზრის გარდაქმნასთან დაკავშირებული საკითხები და ხედვა ალტერნატიული ენერგიის ათვისების შესახებ.